رام الله - نوى /كتبت الناشطة تامي رفيدي على صفحتها على الفيسبوك:
في فترة زمنية مدتها 3 ايام عرفنا أن رياض المالكي اهم من الوطن نفسه، الرئيس بحبه زي عينيه واكثر، مصالحة ممكن تخرب وحكومة ممكن تتوقف عشان خاطر عيونه، الخلاصة راح يظل قاعد على قلبنا برغم انه ما حد بالبلد ولا حتى بالعالم طايقه وبدو اياه، معطي صلاحيات لوكيل وزارته تيسير جرادات مفتوحة على مصراعيها لدرجة السماح له- أي للوكيل – ان يصف سيارته باب الوزارة وهو الوحيد اللي مسموح الو يعمل هيك...!
نرجع للمالكي والله ما احنا ملحقين، من 4 اشهر عين زوجة اخوه بسفارة اسبانيا مع زوجها وقبل اكم من يوم عين اخوه سفير بكولومبيا...هي راحت مع زوجها بس مصير المنصب مش معروف...اما الوكيل فابنه الاول تعين ملحق ديبلوماسي وشباب البلد اللي معها اعلى شهادات مرمية بالشوارع وعلى المقاهي وابنه الثاني ماخذ منحة دراسة على تركيا... هاي بلاد مقدسة حقيقة ما بتخبى فيها اشي ...!
أما بالنسبة للهباش، حماس مصرة ما بدها اياه، اجى من غزة ما معه مصاري وهلأ صار مالك عقارات وكمان موعود يستلم الحج والعمرة بعد فصلها عن وزارة الاوقاف وبتصير هيئة عامة هو على رأسها لحد ما الله يريد... وربك لما يريد الأحلام تتحقق ...!
رئيس الرقابة المالية والادارية يحال على التقاعد عشان ذكر فساد بعض الوزراء من حيث اهدار المال العام والواسطة والمحسوبية ويتعين بدالو ابو شاكر رئيس هيئة الفساد لأنه الرئيس راضي عنه...!
ويستقيل فريد الجلاد رئيس مجلس القضاء الأعلى على غفلة وباخذ وسام، وبستقيل الاستاذ علي مهنا وزير العدل السابق من حركة فتح ومجلسها الثوري ورئاسة المحكمة الحركية، وانا فكرت اعتراضا على كل التجاوزات اللي بتصير بالبلد يتضح حسب الاقوال انه سيعين مكان الجلاد ولازم يكون مستقل- وصدر القرار فعلاً- . هلأ تسألوني كيف الواحد بصير مستقل هيك بدقيقة ما بعرف الصراحة !!!
وكل هذا صار بعد ما ابو مرزوق وعزام الأحمد تصالحوا وتوجوا هاي الصلحة الجميلة بمحاصصة في مقاعد الوزارة والكل صار فرحان وسعيد، ويتم تكليف د. رامي الحمد الله بتشكيل حكومة مشكلة اصلا شكليا وبصير وزير داخلية وهو ما بقدر ولا بأي حال يكون الو اصلا سلطة على رؤساء اجهزة الامن...
اه ورئيس الوزراء ليسا رئيس جامعة النجاح والموضوع لا يتداول عشان ما في داعي مش اشي كثير مهم!!!
مممم شو كمان اه صح فصل 5 من كوادر حركة فتح من الحركة بتهمة التجنح وانا فعلا مش فاهمه شو هي هاي التهمة بس شكلها مهمة جدا حقيقة، لأنه طلع الها لجنة مكافحة التجنح اللي الله يبعدنا عنه شو ما كان يكون!!!
طبعا ولا نخفيكم سرا انه ليسا ما نشف دم الشهداء قامت لجنة التواصل مع المجتمع الاسرائيلي بالتنسيق لزيارة لا الها طعم ولا ريحة على الرئاسة وهناك تم استقبالهم بحفاوة والتاكيد خلال الزيارة انه التنسيق الامني مقدس والهولوكوست ابشع جريمة بالتاريخ!!! يعني وليسا ما خفي اعظم هذا ملخص ما شاهدناه خلال ايام وفعلا ما في حل الا زلزال!!!
بس سؤال للجنة المركزية بشرفكم مش مستحيين وينكم يا اخوة يا حبايبي جد وينكم!!! ما فيكم واحد او واحدة يطلع يحكي انه اللي بصير عيب...
بس للعلم والحاضر يعلم الغايب الغضب صار كبير بالشارع وحالة الغليان لا بد انها تنفجر وصدقوني الا ما تعاود تنفجر بوجهكم ببساطة لانه بتستاهلوا...والله الموفق ... شكرا!!!! تخيلوا من كل هالأحداث المتسارعة وغير المتوازنة نسيت اذكر انه كل هذا في ظل اضراب الاسرى عن الطعام وكثير منهم بحالة حرجة من 40 يوم وولا حد سائل!!!!!
اخ اخ شو راح انجلط رسمي..
